هل اللّد فعلاً مدينة مختلطة؟

هل اللّد فعلاً مدينة مختلطة؟

بقلم: يارا غرابلي – مشتركة في مشروع على سبيل التغيير 2014-2015

IMG-20150521-WA0000 IMG-20150521-WA0020 IMG_3444 IMG_3447ذهبنا في جولة الى مدينة اللّد مع مجموعة على سبيل التغيير.

الصراحة لما عرفت انه في عنا جولة باللد قلت لنفسي اه، كنت قبل هيك باللد، وبنفس هاي الجولة مع نفس المرشد وهو الناشط خليل ابو شحادة. بس كانت هاي الجولة منشط منيح لذاكرتي.

وصلنا اللد ونزلنا في أول محطة النا وهي”حيّ المحطة” واللي بشمل 6000 نسمة… حكالنا خليل عن الصعوبات الي السّكان بتعيشها بالمحطة وعن عدد الأشخاص الي راحو ضحايا للسكك الحديدية والي هي المدخل الوحيد للحارة حاليا. حكالنا عن عدم اهتمام السلطات المسؤولة على مستوى محلي وقطري لإيجاد حلّ لمشكلة المدخل الخطر للحارة عبر السكك الحديدية.

سمعنا قصص عن العائلات العايشة في المحطة ومشاكلها مع المخدّرات والسموم. بكل عيلة في “غنمة سوداء” بما معنها واحد من العيلة الي ببيع سموم واذا مش ببيع بستعمل.

واحنا مارقين بجنب ملعب الفوطبول شفنا بالصدفة كبسية بوليسيّة بتعمل تفتيش على احدى العائلات… انا من الجنب ارتعبت من منظرهم الشرس وكميّتهم، ومن الكلاب اللي معهم، بعرفش ليه، ادركت انه الوضع مركّب اكثر من هيك، شفت قديش مش هوين الاشي، وتقريبا أُغمى علي.

افتتحت هذا بالسّؤال :هل مدينة اللد فعلا مختلطة؟ تعالوا نفحص الحقائق ونشوف:

هل يعقل أنه يكون جدار فصل عنصري بين حي عربي وحي يهودي بدولة تدعي أنها دولة ديمقراطية؟ بين حي بيارة شنّير العربي وبين الحي اليهودي المجاور اليه نير تسفي في جدار فصل! هذا جدار يستعمل كطريقة لقمع ولاضطهاد السّكان العرب. وهاد الشي ببساطة بعطي الشرعية انه يكون فصل عنصري، كامل ومتكامل. صح باللد في يهود وفي عرب، بس عايشين باحياء منعزلة بعضها عن البعض.

حدثنا خليل عن مخططات تهويد اللد، عن جلب المستوطنين وتوفير بيوت الهم باسعار كثير رخيصة، وعن مضايقتهم للسكان العرب الي جنبهم وطبعا عن البوليس اللي بحميهن دايما.

كانت جولة ممتازة وواقعية، من خلالها ممكن تتعرفي على اللد، على المشاكل الي بتمرقها المدينة وعلى الإهمال الي موجود والي أدى للوضع الصعب الحالي. تعالوا نتذكر شو وكيف كانت اللد زمان، وانه اللد من اعظم وأقدم مدن بفلسطين التاريخية، واليوم وبعد الاحتلال صارت مدينة مليانة إهمال، بطالة، وفقر!

امتدادات سياسات الفصل والعنصرية المعتمدة من قبل الحكومة الاسرائيلية تتبع النهج ذاته في كل المناطق، أكثر ما يمكن عرب على أقل ما يمكن أرض.

0 Comments

Leave a reply

لن يتم نشر عنوان بريدك الإلكتروني. الحقول الإلزامية مشار إليها بـ *

*